يا حلمي اللي بين الأجفان طاريك
نام بخفوقي.. والمحاني ظلالك
أحميك من برد المشاعر وادفيك
رمضى عروقي عمرها ما تنالك
هذي يديني حلمها لمس أياديك
وأسأل عيون ما تدَور بدالك
آمر وأنا باخذ من العمر وأعطيك
وش فايدة عمري بَليا وصالك
إن كان نزف الجرح يا حلم يرضيك
إشرب وريدي لين يروي خيالك
وإن كان دمع العين ذكرى تسليك
هذي عيوني وأعتبرها حلالك
مَدْري خطاي أني من القلب مِغليك
وإلا الجفا نزوه فرضها دلالك
ذاب العمر وشفاه قلبي تناديك
ضاع الجواب ولا وصلني سؤالك
