يالله يامنشي مزون المخاييل
يا عالمٍ بالحال رب العبادي
تفرج لمن صارت عظامه مناحيل
والجفن عيّا لايجيه الرقادي
ليلي يعاندني وانا عاند الليل
ياطول ساعاته ومكثر عنادي
يقول لي طول السهر يقضي الحيل
ترى السهر مافيه غير الجهادي
اهموم قلبي زادت الكيل بالكيل
وصار السهر للعين ياليل عادي
امنّول اسهر فيه اغني مواويل
وافرح وانا سهران والجو هادي
واليوم تسهرني هموم وغرابيل
وجروح تنزف من صميم الفوادي
وجدي على خلّ رموشه مظاليل
وجد الغريق اللي يصيح وينادي
اربع عشر عامٍ عن العدل والميل
عز ومحبه وعشرةٍ ماتزادي
واليوم صدق بي هل القال والقيل
أهل الحسد ومنقلين الدوادي
الله يبيحه والعزا فالمقابيل
والا الخطا ماجاه مني قوادي
ومالي جدا الا اسهر واراقبك يا سهيل
حيث ان فيك اوصاف غاية مرادي
