من هو اللي كل ما سالت دموعك فوق خدينك مسحها
كل ما شاف الدموع تهل من عينك تجاريها دموعه
يحفظ أسرارك في قلبه لو يطول الصد منك ما فضحها
القناعة كنز عنده مير نفسه منك ما تحسب قنوعه
ما تطيع النفس في حبك لعذال ونصاح نصحها
من غرق في بحر حبك صعب يا خلي يبي يعرف طلوعه
لك محبٍ كل غلطاتك لاجل خاطرك لا تزعل سمحها
يخسر العالم لاجل يرضيك ويولع على وصلك شموعه
يسبح بحور الغرام اللي ما حد قبله تحداها وسبحها
ما تحصل عاشق يعشقك حتى الموت ويدللك نوعه
غصب عنه تفيض لك صاف المشاعر لو يحاول ما كبحها
شايل له بحر هايج بالمشاعر والمحبه في ضلوعه
يوم نفسه في طريق الغي سيرها ولاقت من ذبحها
ذاق لوعات الزمن وصلاً حياته كلها لوعه بلوعه
من هو اللي ما عرفك ويذكر الدنيا على خير ومدحها
ومن هو اللي يعرفك ويقول دنيا الحب والاحلام روعه
