الا يا جاهلٍ بالشعر خله ما عليك حسوف
عساك تفارقه ويجيه ناسٍ له يوفونه
يبا يشكيك للقاضي لعله ينصفه ويروف
بحاله يوم حظه طاح معك وجاه طاعونه
ويبا يحكم عليك بضربة العجر أو خمس كفوف
على شانك تبليت الشعر واخلفت مضمونه
وخل الشعر لأهله يا ردي الحظ يا ملقوف
ولو انك من عيال آدم عيال آدم يزورونه
تبليت الشعر بالكذب هو والواسطة والزوف
وصار يصيح يستنجد ينادي من يغيثونه
ولو دورت لك شغله تبيع الخس والملفوف
تراها أحسن من اللي يزعج الجمهور بلحونه
وأنا باقول حق لمن يعرف العلم والمعروف
وأنا شاعر كتبت القاف ونظمت أبيات موزونه
رسمت الحرف سطرته وكلن يستمع ويشوف
وبحر الشعر واسع وأكثر العربان يدرونه
وأنا قلبي يحب الزين وحصه ما تشابه نوف
وكلن له مزاج ومغرمٍ في حب مزيونه
ومن يبغا يحج البيت يتوب ويعتمر ويطوف
ومن هو يطلب العليا لزوم تسهر عيونه
