خذ قلبي اللي بالمودة صفا لك
دام القصايد كلها ما تكفّيك
واللي تبيه إن كان عندي حلالك
ما هو كثيرٍ لا غدا بين أياديك
يا من جمعت الود كله لحالك
بأقصى خفوقٍ يفتخر بك ويغليك
أهديت قلبي فرحته في وصالك
واليوم أنا ما نيب داري وش اهديك
دام العطا معناه ساكن خيالك
ما أقدر أفسّر في خيالك معانيك
لكن تمنيت أوصل حدود بالك
وأعرف وش أغلى ما تمنّاه واعطيك
ليت السعادة دايم تصير حالك
وأحلى الأماني طول عمرك تهنّيك
والاَّ أشيل هموم نفسك بدالك
علّ الزمان اللي يزعّلك يرضيك
وإن قلت خذ من خاطري ما بدا لك
يفداك، ما يغلى على فرحتي فيك
كل المشاعر لو تبيها فدا لك
دام الشعر حتى الشعر ما يكفّيك
