نويت تكسير الجسور المنيعه
وقررت احط العقل للقلب نبراس
من عافني والله لا اعيفه وابيعه
ومن شالني بالعين شلته على الراس
وماني من اللي يهتوون القطيعه
وبعض الأوادم وصلها يتعس الناس
ولاني من اللي يخلفون الطبيعه
ان قلت احبك قلتها بصدق واحساس
ويا راس لو قلبي خفق لاتطيعه
قطع عروق القلب من قبل ينداس
شتت حطام القلب واحرق ربيعه
ولا عاش حب صار يهدي لي اتعاس
ويا قلب لو ضاقت عليك الوسيعه
قل لا إله إلا الولي رب الانفاس
هي غلطتي سلمت روحي وديعه
لخل سمع دق العواذل للأجراس
كانك ذهب يا بنت نفسي رفيعه
غيرك ترى يشري ترابي بالألماس
وماني فهد وان ما جعلتك صريعه
مثل الحبارى لا غدت تحت قرناس
وما هوب عيب لو شكيت الوجيعه
العيب والله رجعتي خاضع الراس
روحي عن عيوني بلايا رجيعه
ومجنون قلبي يوم حبك بلا ساس
