الصدر ضايق وقلبي تشتعل ناره
والفكر شارد وليل الهم ساريبه
والدمع جاري وخلي غابت اخباره
ابطى عليه وعذبني بأساليبه
ضاعت حياتي وروحي فيه محتارة
مليت صده وهجرانه وتعذيبه
الصاحب اللي بعيني بيته وداره
اللي تربى على عيني وداريبه
الصاحب اللي شبيه البدر بانواره
في كل ساعة أناديبه وأهليبه
انا اشهد أنه ربيع العمر وازهاره
إذا تبسم يغار الطيب من طيبه
أنا أشهد أنه غصون القلب وأثماره
تذبل ثمار الحشا لو طول الغيبه
ليته درى بالذي باحت به أسراره
من ضيق صدره يهم الثوب يرميبه
ليته درى بالذي تلعب به أفكاره
وحده يقاسي صنوف الشك والريبه
يا سيدي لك فؤادي نظم أشعاره
يستعطفك ليت توفي له مطاليبه
