لعل شعر ما تباها بسلمان
وأثني على شخصه وفعل نشوفه
ما ينبني بيته على كل الأوزان
ولا ترتفع فوق المنابر حروفه
ولا ينكتب في كل صفحة وديوان
ولا تحتويه السالفة والطروفه
وراه ما يذكر مزايا كحيلان
زبن الضعيف ومن تحده ظروفه
أمير نجد اللي له المجد عنوان
مواقفه للمسلمين معروفه
يمسح بكفه دمعةٍ كلها أحزان
يسلم لنا راسه وتسلم كفوفه
على سنام المجد في كل ميدان
والله ما تلحق حروفي وصوفه
أبو فهد وأخو (فهد حام الأوطان)
عيال من شاف الجميع معروفه
جمع شتات كان. والحق ما كان
الظلم سايد والحياة محفوفه
لين إنها صارت رخاء وأمن وأمان
والغير بلشان بامانه وخوفه
فيها حقوق الدين وحقوق الإنسان
من غير حق البيت واللي يطوفه
هي دارنا دار العطاء دار الإحسان
دار الكريم اللي تحمده ضيوفه
