البيوت اللي معانيها صحاحي
نصيت مني مدارات الجزيره
ما تضمن لا سؤال ولا اقتراحي
شاعر وده يشارك بتعبيره
حاير فكره وباله ما استراحي
بعد شاف تراثنا بدل بغيره
بدله من عاود الرحلة سياحي
صوب دارٍ ما لنا فيها عشيره
ساح فيها أيام في عدة نواحي
وأكتسب موروث أهلها في ضميره
جاب له لهجات ما فيها صلاحي
وأشرطة شعراً مضامينه حقيره
يحسب أن الشعر دبكات وصياحي
ما درى أنه سيف والشاعر جفيره
شعرنا هو مجدنا مثل الوشاحي
نفتخر به في جزيرتنا الكبيره
وحبنا لتراثنا أساس النجاحي
في الزمان اللي تقاليده خطيره
والنجاح محققينه بالكفاحي
نخبة رجال مواقفهم كثيره
انهضوا بالشعر من كل النواحي
واشعلوا في ساحته شمعة منيره
وفرقوا بين الهماج من القراحي
وأكسبوا حب الجماهير الغفيره
«والجزيرة» حبها شيء مباحي
صيتها عند العرب في كل ديره
صدقوني يا بعيدين المشاحي
مالها في قلب عاشقها خشيره
