أسألك بالله يا عذب اللمى
وش بقالي في خفوقك من غرام؟!
ان بقالي يا حبيبي مثلما
يذكر الناسي تعدّاك الملام!!
وان بقالي بين نظراتك ظما
بشّر اعيونٍ على شوفك حيام
وان تصوّر لك خيالي كلما
هيّض التذكار نسناس الهيام
فاذكر اللي حبك بقلبه نما
لين لامس فرعه أطراف الغمام
وناض برق الشوق واحساسه همى
بالشعور اللي عجز عنه الكلام
جعل عين ما تحبك بالعمى
بعد نور الشوف يغشاها الظلام
في غيابك مالي أرض ولاسما
كان ناسيني على الحب السلام
