يا من نشدتوني عن آخر قصيده
التالية ما هيب مثل العوايد
وين الورق وين القلم والجديده
ما به جديد ولا ببالي قصايد
من يوم غاب اللي خفوقي يريده
اللي غلاه بكل الأعماق سايد
اللي فرح وقتي بحبه يزيده
شوفه هنايه بالرخاء والشدايد
كان الشقاء كان الحياة السعيده
كان الجروح وكان كل الفوايد
كان بحضوره كل فرحه فريده
يأمر وأنا لا قال ما قلت كايد
لكن رحل عني وصرت الوحيده
وأنا أعرفه لاراح ما هوب عايد
باسباب راح ومكسبي من رصيده
دمع العيون وهجر ذيك الوسايد
ياناشدين الله يعين القصيده
ما به جديد إلا عذاب القصايد
