ياهاجس بالضمير وحيل متعبني..
يرسله نبضي لعقلي يوم مريتك
أحس بالقلب جزءٍ مايجاوبني..
ما سمع صدى صوته إلا حين ناديتك
بتداعيات الغلا نبضه يجاذبني..
أطراف ذكرى بموجبها غدا بيتك
وينتابني الخوف ماحي يناسبني..
إلا انت ياللي العمر والروح أهديتك
لمحت بعيون شخصك شي اطربني..
واسلوب عيني بودي تفهمه ليتك
مشاعر للوفا والود تندبني..
لو منت تطرب احساسي ماتمنيتك
فديت ذيك العيون اللي تخاطبني..
ماكني إلا غرير ماتعديتك
خليتني بين هم البعد يرهبني..
ورجوى خفوق بهيجن لا تحريتك
وأيام تصدق معي وأيام تكذبني..
يعني استغليت وضعي لاني اغليتك
سولف.. استرسل ولوانك معذبني..
نغمات صوتك تشتتني اليا اوحيتك
بغوص بأعماق نفسك لاتعاتبني..
أدري ان (قلبك لغيري) بس حبيتك
