أنا مبطي أهوّنها إذا ضاقت أقول تهون
أقول الله يفرجها يزيل الهم والضيقه
بأمر الله سبحانه يفرج كربة المحزون
يبدد جملة أحزاني كريم مع مخاليقه
أنا يا الله في وجهك وكل الخلق لك يرجون
حشا والله ما غيرك يبدد حزن ما اطيقه
دخيلك طالت سنيني أعاني همّي المدفون
أنا لا جيت أغربها تجي بالعكس تشريقه
أنا مليت اجاريها يكفي خافقي المطعون
من أول ما اشرقت شمسي لساني ناشف ريقه
أنا مليت اجاملها وانا أدري ان الغلا مجنون
ينزل عالي الهامة وحلمي صعب تحقيقه
أنا مالي رصيد إلا رصيدي بالشقا مضمون
رصيدي عالي رقمه وختم الهم تصديقه
أعوم بزورق أحلامي أجامل والشقا مسجون
بطير الحلم في صدري وهمي في مسابيقه
ضمنها من ضمنها من يقول أن الفرج مرهون
جحدها ما جحدها والشقا تبطي مواثيقه
مواريها تبيّن لك مثل سيف اللقا المسنون
في وجه أحزانك تسله يا عل الله ما يعيقه
بأمر الله سبحانه يفرج كربة المحزون
يبدد جملة أحزاني يزيل الهم والضيقه
