مثايل الشاعر جديده ودرّاس
والقاف يعرف من بداية مشده
والشاعر المبدع بلاشك حساس
لا سمع معنى به مهاره يشده
شد انتباهه والتنافس على الكاس
والخيل في يوم السبق مستعده
من لا يدوس الراي بالضيق ينداس
ما ينفع الحطاب حبلٍ يمده
الشك عصمه مار الى زاد وسواس
يحمّل الرجال حملٍ يضده
الكل شي احدود والطيب نوماس
يا حظ من ياخذ من الطيب حده
سيف الدهر مرهف وياكل من الناس
واليا اندثر سود الليالي تحده
ياويل من ناشه على قلت الراس
يصبح عشاً للحوت في بحر جده
قلته وانا وضعي من العام منحاس
جارت على قلبي حمول الموده
اثر المحبة ما لها حد وقياس
وبحر المحبه موت جزره ومده
يابو عيونٍ ترسل الموت نعاس
اخذت قلبي لو تكرم ترده
