النوم يا طاحوس ما نيب وياه
بعض الليالي ليلة سرمديه
تناوش اللي يطوي البعد ممشاه
شيك على «المأمون» وخذ الوصيه
شيك على زيته وشيك على مياه
واضرب عليه السهله الجرهديه
يا قاك خلاق البريه وياقاه
سافر وترجع بالسلامة عليه
واليا وصلت بشايه الله وحماه
عدة على قصر شمال العليه
لا جيت في حي الصحافة بتلقاه
قصر الصيفي كبر هضبة طميه
بيت بناه أبو محمد وسواه
ولا حط لابوابه قفول عجميه
من حدته سود الليالي تنصاه
أقولها والناس تشهد عليه
كبرت على هلال المطيري وناداه
قصة قتل فيها مواقف حميه
وطش الشماغ وقدم المال والجاه
واطلق صراحه يوم عيد الضحيه
ما هو كلام اللي كلامه ما يحماه
هذي حقايق بالفعول محميه
فعل تشيد أبه الدواسر وتزهاه
فعل الصيفي باليمين النديه
مما سمعنا من فهوله وشفناه
خلا بيوت الشعر تأتي جريه
يزين تركيبه وسبكه ومعناه
في مدح شخصيه عزيزة قويه
