أنا لولا الخواطر والقلم والشعر والترحال

تسليني عن همومي تلقيت الخلا الخالي

أنا شاعر ولا حب المشاعر في الضمير تغال

وراعي الذوق ما يخفى عليه المر والحالي أفاضلها وأميّز بين ما يترك وما ينقال

واعرف ان السكوت أحيان والصدات أجدالي

تمهل يا نديمي طالبك لاتجرح الآمال

ترى بعض الهموم الغالية محذور تنقالي

كما يعبّر عن الفرح المكذوب:

من عادة الكذاب دس الاكاذيب

يحلف على المنسوب لو هو كذايب

لا ما على الاحباب لوم وتثريب

لا يفرح المكذوب ساس الخرايب

العاذل اللي خاب راع العذاريب

وده يثير حروب بين الحبايب

ياناحي الغيّاب خذ لي مكاتيب

بلغ بها المحبوب مني ندايب

قله ترى ما صاب رمي الحراريب

واقفى العدو مغلوب شر الغلايب

وسلّم على اللي غاب سيد الرعابيب

وانقل مع المكتوب ورد النبايب

عذب النبا والناب نور الاعاريب

الجادل الرعبوب حلو الطرايب

من هرجته ينساب شهد اليعاسيب

وبضحكته مشبوب برق السحايب

والورد والعنّاب حدر الجلابيب

عن النظر محجوب ما هوب سايب

على خد الثرى نسعى عسى سعي القدم مشكور

عسى حجاتنا في تالي الاعمار مبرورة

عسى ذنب الجهل والعمد والغفلة يجي مغفور

الى عرضت صحايفنا على الأشهاد منشوره

ألا يا نفسي الجهلا.. ترى الدنيا متاع غرور

ترى الأيام لو طالت على الآجال مقصوره

ألا يا الله يا عالم خفيات الدجى والنور

تروف بحال من نفسه على الإيمان مفطوره

يا زين وينك يوم الاحلام ثرّه

يوم الهوا يلعب بخفاق شاعرك

يومك بعيني أجمل البيض طرّه

والروح ترعى بالموده مشاعرك

بعض الغلا ما منه غير المضره

لي صار خلك بالهوا ما يشاطرك

اليوم لا تتعب على وتشره

كاني بليا قصد حسيت خاطرك

سامح جريح نفسه اليوم حرّه

عاذر ولا له شف ينهي ويا مرك

القلب ما يوخذ على حين غره

ما ينخدع لو غرق الدمع ناظرك

يا رهيف الحس يا ريم الغلا

لا تذير ينكدر جو الغرام

يوم شفتك زال همي وانجلا

في جناب الروض ممشوق القوام

لا مشيت أرخت زماليق الكلا

لك زهرها في خضوع وفي هيام

انتشت لجلك وقالت ياهلا

والعبير يفوح ترحيب وسلام