يا سايق الموتر ترفق على الهون
واحذر من السرعة وقطع الاشاره
كم واحد باسبابها اليوم محزون
وكم واحد راحت حياته خساره
وكم واحد خلف لاطفال يدعون
باسمه وهو عنهم بعيدٍ مزاره
هذا يبي دفتر وهذي تبي لون
وزوجة ترمّل بعد موته بداره
وكم من بري حاله اليوم وشلون
اتبدلت عقب الحلا بالمراره
باسباب جهل للمواتر يسوقون
لا رخصة بيده ولا ايضا استماره
واطفال همل في الشوارع يدورون
ومع صغر سنه باليمين الزقاره
واليا سألته ليه تفحيط واجنون
جالك جوابه ذاك فن ومهاره
لا تحسب التفحيط يا جاهل فنون
مع جدعت الموتر يمين ويساره
وترى القياده فن لو كان تدرون
وتجاوزك للغير ما هي شطاره
تكفون يا اهل الامر تكفون تكفون
حطوا نظام صارم في قراره
حطوا نظام يحفظ النفس ويصون
ويردع هل التفحيط واهل القشاره
ولا تسمحوا للي على الناس يخطون
ولا ترحموا من هو تعدى مساره
وانصحك يا سايق ترفق على الهون
واحذر من السرعة وقطع الاشاره
