لا.. والله العين عاودها السهر بدري

وأنا احسب ان الشهر عن جفنها راحي

مدري وش اللي حصل مدري ولا يدري

الا عليمٍ نفخ في الانس الارواحي

من عام الاول وضيقة صدري بصدري

ضيقة بعدها شرد فكرٍ قبل صاحي

مشاكلٍ جاك فيها الوقت منحدري

من كوكبٍ في فضاء الصدمات سباحي

قابل بوجهٍ عبوس شاحبٍ ودري

عني ما خفى وش القصة ولا باحي

لكن انا ما رضيت لصاحب الغدري

ما عاد يوجد علاقة غدر وانصاحي

من حقي اتعب على شأن اعرف قدري

ما غرني بالعرب ضاحك ومزاحي

الحر ما شوَّقه جولٍ وهو كدري

له عزةٍ ترفعه في رأس ملواحي

محد جنا ورد من ثمرة شجر سدري

صعب الخساير توافق هي والارباحي

ورجلٍ على غير ساس إيشيد الجدري

لو قام مبناه لا يندم ليا طاحي