تعبت كم لي بين مشتاق ومعيف
أجيك مشتاقٍ واجي منك عايف
يامن غلاك يفوق كل التواصيف
ماني شجاع إن قلت مانيب خايف
ما للشجاعه في بحورك مجاديف
يم الجروح الموجعات الرهايف
دونك متاهات الزمن والصواديف
حالوا عليك مفرقين الولايف
والا الغلا ما فيه غيرك مواليف
ولا حافني يا كود طاريك حايف
إي والله إني من سبب حبك امهيف
واني على جالٍ هيالٍ مهايف
وإني على وقتي كثير التحاسيف
حيث إن دونك ما بوقتي حسايف
وانه تجاوز واقعي جرح يا حيف
وش للثقيله والجروح الخفايف
هذي حدودي غير ما هي عن الكيف
مهما جرحتيني بويش انت شايف
من يوم جبتي في خفوقي وانا ضيف
عندك وحكم الضيف ماله وظايف
