السؤال اللي نخاني وين أبلقى له جواب

والعيون اللي نختني كيف اجيب احبابها

القلوب اقفت خوالي ما يفيد بها عتاب

قدرة الله لاخذاها.. قدرته لاجابها

اجهل الحل لمصابي واعرف الوان العذاب

راضي بالحالة اللي ما هقيت ارضى بها

يابس العشب ان تمنى ما درى عنه السحاب

والهموم غزتني اللي ما درى بي نابها

شايل بالقلب جرحي وان هقيت الجرح طاب

مرني الحب وسألني ليه؟ طال غيابها

ما درى انه في سؤاله فاتح للهم باب

وش ورى ذكرى الحبايب لو فتحت كتابها

والله اني لو ادور وش هي اسباب الغياب؟

ذا جوابي دمعتين ما عرفت اسبابها