يالله ياللي لواسع الكون نسقت
انت الذي كل الخلايق خلقته
وانت الذي انجيت وافنيت واعتقت
واحييت جيل وجيل زال ومحقته
فرعون من بعد التجبر له اغرقت
وموج البحر عن درب موسى فلقته
انشيت سحب الغيم بالمزن له سقت
سيله على القاع المحيلة دفقته
ياللي على غيب الضماير تهايقت
ياخالقي ما غير بابك طرقته
ياخالقي بحبال جودك تعلقت
يارب حبلك ما تفصم احلقته
سمعت ما قاله نبيك وصدقت
وتبعت دين المصطفى واعتنقته
واطلب عساي بطاعة الله توفقت
الرشد عن درب الضلالة فرقته
باسمك بديت وللمعاني تطرقت
فاض القريض ومن لساني نطقته
مدحت عنوان الصخى ما تملقت
قولي بمدحه واقعي ما اختلقته
لاشك مهما في مديحه تعمقت
وصفه يفوق اللي بعيني رمقته
يابو فهد بالمجد فقت وتفوقت
والمدح والتمجيد والوصف فقته
أنت الذي يامير للطايله تقت
وانت الذي فعل المراجل عشقته
البخل عفته بالثلاثة وطلقت
ولا هي غريبة لو عطيته اورقته
يابو فهد ما يوم للجود فارقت
حيث الصخى في راح كفك رفقته
ما يوم من كثر الهواشل تضايقت
وكم معسر من رزق ربك رزقته
يامزبن اللي يشتكي ميلت الوقت
ينصاك بالشدات من شان وقته
وأن جالك اللي قال للحمل ما طقت
من ثقل حمله فوق حملك وسقته
ياما عطيت من المحاويج وانفقت
مالك على فقر الضعافي هرقته
من كثر بذلك ما تمللت وارهقت
تطلب من المولى مثوبة اصدقته
بالمرجلة لأخلاق والدك طبقت
تفرح صديقك والمعادي عزقته
حصلت مقصود الرجوله وحققت
وانت الذي سور الضديد اخترقته
واهل الغدر والبوق لقلوبها احرقت
تدحر خصيمك ما تهمك اشهقته
وأن كان ضاع الحلم لعداك زهقت
تطعن عدوك ما تفيده ادرقته
لكن عدوك ما غدرته ولا بقت
جيته على وضح النقا ما درقته
وانت الذي لخلول الأضداد فتقت
ومن لا مشى بالحق ستره هتقته
جداه قوله ليتني ما توهقت
يوم انت في كف العداله صفقته
اصغيت للشاكي من الظلم واطرقت
وتسمل عيون اللي تحملق حدقته
اللي اشتكى من مظلمه به ترفقت
واللي يعيل تعدله عن طفقته
سديت باب الشر يامير واغلقت
من عال عن دربه عثرته وعقته
فكرت بحلول المشاكل وبرقت
والحق دون المشتكي ما خنقته
عادل ومن حكم العداله توثقت
والمجد مبطي وارثه ما سرقته
شبحك على العليا ولا يوم دنقت
سعيت للعليا وشفك لحقته
وعن رقي مشموخ العلا ما تعوقت
تصعد ومن رام المعالي فهقته
حتى على روس الشوامخ تسلقت
واللي يسابق بالمفاخر سبقته
قلته ولا ني لكلمة الزور لفقت
والشعر صوت من القوافي زعقته
سطرت من عذب المثايل ونمقت
ذوب العسل ترايق شهده لعقته
غربت بالدار الوسيعة وشرقت
والمر والحالي بدنياي ذقته
وصلوا على اللي بسنته حرم المقت
عد الطعوس اللي تزاوما برقته.
