يا قاض في حكم الهوى ماني بقاض
لوك نظرت اللي بهدبها ينوضي
ولوك قريت اسمي تعابير الالحاض
المعذرة ماشاف حسنك يا (....)
حسنك ورا علم البلاغة والاغراض
وتجف من دونه بحور العروضي
لا يا بعد كل المعاني والالفاظ
نفسي من الفرقا عليها تفوضي
وش عاد لو بابكي على تلك الانقاض
والثم من اللوعة بقايا الرضوضي
قبلي بكاها النابغة ناقد عكاظ
والعشق سقم اللي لبحره يخوضي
أعوام أعالج عاتي الشوق فيّاض
يا كيف ابفعل في رداة الحظوظي
ولو كان مالي بساحة الشعر مركاض
جداي أعزي النفس والله يعوضي
راح الذي قربه بساتين ورياض
ونبت مكانه خمط.. واثل.. وحموضي
لا واه يا قلب من البعد مغتاظ
يا قاض أنا حالي كساها الغموضي
يا قاض ما عشت الهوى غدر واجحاظ
أنا قتيل اللي بهدبها ينوضي
