نشرنا في عدد الاسبوع الماضي لغزاً كتبه الشاعر ناصر بن سعد السهلي وكان نصه:
|
ابا انشد الشعار واللي يحلون
يا ويش رجال على جنب عذراء
يعطيك علم داخل البنت مكنون
براسه المرسوم يا ناس يقرا |
وقد وصلتنا عشرات الحلول اخترنا منها ما اكتملت فيه شروط النشر فجاءت كما يلي:
|
يا السايق أرفق في القيادة وبالهون
عينت في السرعة بلاوي وشرا
واسحب عيار الزيت من قبل تمشون
الزيت نقصه للمكينة مضرا |
ضافي سعود الغييثات - الافلاج
|
عسى السيول اللي تجي كل مطمون
يخضّر منها كل وادي وصحراء
وياللي تمشى خذ نصيحة بمليون
لازم عيار الزيت يظهر ويقرا |
سعد مويزر البدراني - الرس
|
يا الله يا المطلوب يا خالق الكون
تغفر ذنوب العبد سر وجهرا
الحل يا كاتب لغز جاك موزون
حله عيار الزيت لا صرت تقرا |
عبدالله بن سعود بن سيف الغييثات - الافلاج
|
بعض العرب لاقاد يسرع ومجنون
ما شفت في السرعة علوم يسرا
افحص عيار الزيت دايم وبالهون
عيار المكينة كل فترة يجرا |
خالد سعود الغييثات - الافلاج
|
يا بوسعد يا للي تبي الرد ممنون
قريت لغزك بين وشيقر وشقراء
اقول عيار الزيت لازم تشوفون
واحذر تولع لمبة الزيت حمراء |
محمد بن عبدالعزيز الخنيفر - اشيقر
|
الناس قاموا للسفر يستعدون
امطار من فضل الولي وارض خضراء
وكل تفقد موتره قبل يمشون
وشافوا «عيار الزيت» للزيت قدرا |
سالم مقبل الغرابي الحربي - القيصومه
|
اللي يروض مهرة الشعر بالهون
ما هو مثل من يعسر القاف عسراء
واللي بخدمة حضرة البنت ممنون
اعيار زيت بالمهمات يطرا |
ابن عمار - الزلفي
|
يا اللي كتبت اللغز والحل مدفون
اعقرت حله وسط الابيات عقرا
انشد هل الالغاز واللي يحلون
حله عيار الزيت والعين تقرا |
عبدالعزيز عبدالله الجناحي - القويعية
|
يا مرحبا واعداد خلق يصلون
واعداد ما تنور على الارض قمراء
الحل واضح ما يبي شك وظنون
حله عيار الزيت ما فيه هذراء |
هندي بن نابت الغياثات - الافلاج
|
يا ناس انا في حل الالغاز مفتون
لكن من اللي للصحف دوم يقرا
والفضل لله جبت ذا الحل مضمون
هذا عيار الزيت في وسط مجرا |
محمد بن سعد ال جناح - القويعية
|
يا مرحبا من خاطر صار ممنون
ويا ناشد الشعار بالحاجة ادرا
موترك زيته عايره قدم تمشون
وتقبلوا تحية والف شكرا |
شبيب بن هذال السبيعي - الخرمة
|
بالقاف يا ناصر على الدوم مفتون
لوني وراء اليابان والا بشقراء
هذا«عيار الزيت» والناس يدرون
في وسط ظلما ما بها نور قمراء |
مشاري خالد الدعجاني - شقراء
|
وافقت ناس من على الجمس يمشون
في وسط ريضان زهيه وخضراء
سواقهم يمشي على الدرب بالهون
(عاير زيوته) قبل ياتيه مسراء |
علي رشيد الرشيد - رياض الخبراء
|
هذا (عيار الزيت) ياللي تعرفون
له بالمكينة ياهل العرف مجرا
يعرف عليه النقص والزود واللون
تقرير لا يكتب ولا هوب يقرا |
صويلح بن عبيسان الشيباني - الرياض
|
لغز بعرف الناس وافي وموزون
لا جلب في سوق الجزيلات يشرا
ربحان شرايه.. ولا هوب مغبون
لو هو عيار نازل وسط غدرا |
فهد الجروان - الزلفي
|
يا ناصر المنعور والقاف موزون
هذي حلول اللغز وانته به ادرا
نبغى غيار الزيت من دون سيفون
شفت العيار اسود ولا فيه صبرا |
عبدالهادي فهاد العرجاني - الافلاج
|
حليت لغزك يا ولد حل مضمون
وترا عيار الزيت مخبور خبرا
موجود في كل المواتر وموزون
هو شغلته داخل ولا هي ببرا |
عبدالله بن طلحاب بن مرزوق العبري - الرياض
|
لا هانوا اصحاب الجزيرة ولا تهون
اللي لهم عند الرجاجيل قدرا
الزيت له مقياس صادق ومضمون
لولا عيار الزيت ما عنه يدرا |
بجاد بن بجاد البقمي - الرياض
|
خذ الكلام اللي بلا شك وظنون
ترا النصائح يا بن الاجواد تشرا
انظر عيار الزيت لا صار مبخون
وحذراك من سلعة هل الغش حذرا |
عايد بن نوار العنزي - الرياض
|
سلام ما توضي بروق من امزون
تسرى ظلام الليل والناس سدرا
ارسل جوابي ضمن منهم يحلون
افحص (عيار الزيت) صبح وعصرا |
فالح غازي الحربي - رياض الخبراء
|
هلا هلا يا بو سعد والف مليون
تعداد من يحرم لحج وعمرا
عيار المكينة داخل الزيت مسجون
لو ما تجاوز والاشارات حمرا |
حمود نافع الشمري - الخبر
