سر يا قلم واكتب وعطني على الكيف
بنات فكري واردات ظمايا
مثل القطيع اللي تدك المشاريف
لا درهم الراعي وصك الحنايا
واكتب عن اللي سيرته بالتواصيف
ماتنتوصف في جميع البرايا
عبدالعزيز اللي صمد بالمواقيف
زيزوم فرسان ومقدم سرايا
لاجا نهار يقلب الراس ومخيف
يقلط الى هابوا سهوم المنايا
كم سربة ياخذ عليها مزاغيف
فوق المهار وفوق عوص المطايا
ما ذكر بالتاريخ مثله ولا شيف
ولا أظن مثله ينجبن الصبايا
طاعة له العربان بالمدن والريف
وتوحدت له من جميع النحايا
واليوم في عهد الرجال العواريف
لطامة للشره لا جاء المعايا
في عهد أبو فيصل من السيف للسيف
والجهل راح ولا بقا له بقايا
في صالح النهضة يسوق المصاريف
طور مشاريع الهجر والقرايا
ويركي على كبد المعادي مراضيف
وللصاحب أحلى من حليب الهدايا
الله يجيره من جميع الصواديف
سور البلاد إن كلحن الشفايا
ويسانده من يكرم الجار والضيف
اللي كمل طيبه بكل المزايا
عبدالله ان جات الليالي شفاشيف
حاتم زمانه بالكرم والعطايا
يعطي عطايا ما وراها تحاسيف
عون الضعيف اللي إركابه ونايا
وسلطان قايد مبعدات المحاريف
لا ثغرب المضهود يا أهل الحمايا
سور البلاد من البعث والمحاذيف
درع الوطن لا جا اختلاف الهوايا
ونايف يوطي من براسه زعانيف
يرتاع من طاريه شين السوايا
للأمن تطويره بدقة وتهديف
وخلا السباع يجنبن الرعايا
وسلمان والله ما يبي زود تعريف
حلحيل حلال العقد والقضايا
حر مضاريبه تخج السراجيف
عليه من صقر الجزيرة حلايا
الين من الديباج واقطع من السيف
وادهى من اللي يدعون الدهايا
توجد به النخوة وللملتجي ريف
وينصاه من غلية عليه الشرايا
قصره يذري من هبوب العواصيف
يا من به اللي يدرق بالزوايا
والمدح بال سعود ما هو بتزييف
قول عليه شهود ما هو حكايا
من لاذ بحماهم فلا يلحقه حيف
وعدوهم تكسر عليه الحدايا
