كل ما اقفت همومي فاجأتني هموم

من سنينٍ طويلة خاطري ماستراح

آتصبر على اللي صابني كل يوم

عل صبرٍ صبرته تاليته النجاح

عاكسن الليالي ما قضيت اللزوم

ولا نفعني قعاد ولا نفعني مراح

كم شيءٍ أحبه صرت منه محروم

وأول الوقت مرهي واحسب انه متاح

ويش اسوي بحظي يوم عيا يقوم

كل ماهو تتهض ياهل العرف طاح

والرجل دون حظٍ مفلس ومهزوم

مثل من خاض حربٍ دون ربع وسلاح

بالخضيراء يعلي كل طيرٍ يحوم

مير وشلون حاله بعد كسر الجناح

اعرف أن الليالي بين برد وسموم

ماتجيك الليالي كلبوها ملاح

والفرح والسعادة كلها ما تدوم

وما مضى ما يعود كل ما راح راح

وبالسخط والتشكي ما تزين العلوم

والبكا والتمني ما تداوي الجراح

الأمل في كريم يرزق الناس دوم

ربنا اللي طلبته بالمسا والصباح

خالق جل ملكه في عباده رحوم

أرجو أنه يبدل ضيقتي بانشراح