يا الله انا طالبك ياخير معبود

يا مدرج كونه على كل لوني

انك ترش الارض بالخير والجود

يا والي القدره تقول ويكوني

حتى يقال العشب بالعين مشهود

وتتيه قطعان الدبش فالحزوني

ونقوم وقت الصبح والرش في زود

يا اللي تبون الخير لا ترقدوني

صوت الرعد كنه فتيل وبارود

وغطت على نور النهار المزوني

غيم وشجر وامطار وأزهار وورود

وارواح طيرٍ غردت باللحوني

وأرض مثل مد البصر وأخضر العود

لا مالت أنسام الهوى بالغصوني

من شاف نور الشمس ما هو بموجود

الغيم غطى عنه كل العيوني

طبيعةٍ تزهى على كل عنقود

وجمالٍ يفوق الهوى والضنوني

وإن جا ظلام الليل وعيونه السود

وارخى سدوله فوقها والمتوني

وسحابة مرت بها برق ورعود

ورشت مطرها فوق الارض الحنوني

وسالت سيولٍ كنها سيف مجرود

ولا كما فكر يسيح ويهوني

ثم فوقت عشب من النوم مردود

وغسلت وجه الزهر بالهتوني

واحيت قلوب ودبت الروح بكبود

وتجمعت فالارض كل الفنوني

ثم زان كيف اللي من العام مضهود

وضحك سن اللي يجر الشجوني