مطلع قصيدة وشدتني مباديها
وقصايدي غالب يمكن مناهجها
أما نصيحه لسوق الخير نهديها
والا تحدث عن أمورٍ تعالجها
كلمة نصف والقصايد من معانيها
ترفع بها المستوى والا تسمجها
وان صارت السالفه فيها ملافيها
اعز نفسي وعرف اللي يخارجها
الكلمه الضايعه ما كني أوحيها
والكلمه الطيبه بالمخ ابرمجها
نفسي لها ذوق وعيوني تقديها
ان كان بعض السلع حرج محرجها
ما كل سلعه من الأسواق نشريها
يظهر لها الضالعه ناسٍ تدرجها
قلته ونفسي ترى ما نيب ازكيها
اخاف من موقفٍ للنفس يحرجها
كلٍ له ظروف بالدنيا يعانيها
وأنا علومي شرحتلكم برامجها
يا ناقل السالفه من راس راعيها
بعض السواليف ليتك ما تروجها
الصمت عنها مع الأيام ينهيها
والطيبه دايمٍ تحمد نتايجها
وجهة نظر والعرب تتبع مباديها
والطرقه الواضحه تعرف مخارجها
والناس تمشي تحت تدبير واليها
منزل الغيث والضيقه يفرّجها
