العيد سنّه ثابته في .. بلدنا
عيد ارمضان وعيد شهر الضحيه
عيدين لا ثالث لهم.. واعتمدنا
وبامر الولي نمشي وسنّة نبيه
ما فيه عيد البنتنا أو ولدنا
أو عيد حب وعيد ناس وقضيه
والشرع نحكم به ومعه اجتهدنا
في كل سنه جاتنا.. محمديه
ننهل من القرآن كامل امددنا
دستورنا الغالي من الله هديه
دستورنا اللي وضّح اللي قصدنا
وبيّن لنا درب السنع والخطيه
نمشي على ما فيه واللي نشدنا
نعطيه من كل الدلايل.. مزيه
وبقيادة الغالي ملكنا فهدنا
معه انتجدد والديانه.. قويه
ونعايده واخوانه اللي سندنا
لا كشرت سود الليال الرديه
ونعايد الشعب السعودي عمدنا
أهل العقول الراجحه.. والوفيه
لا من تكاتفنا على اللي ضهدنا
نوريه من فعل التكاتف منيه
في ظل من هم للقيادة سعدنا
بعد الولي هم ضلنا.. والحميه
فهد وعبدالله معاهم.. صعدنا
حتى وصلنا رايةٍ شاذليه
وسلطان مع نايف تراهم عضدنا
في ساعةٍ بالضيق ماهي حليه
أشبال من هو حط ايده ابيدنا
حتى وصل فينا مواصل.. عليه
عبدالعزيز الحاكم اللي.. ضمدنا
عقب الجهل وامراضنا الأوليه
والخاتمه اعيادنا في .. بلدنا
عيد ارمضان وعيد نحر الضحيه
