العاشق اللي عذبه موعد العيد
وطوف على الميعاد ثلاثة أعياد
ساكت ويخفي دمعة تحزن الغيد
لو شافها يبكي لها سيد الأسياد
ساكت وصارت فرحة العيد تنكيد
وأمر حصل عساه ما عاد ينعاد
حبك بقلبي ثابت بكل تأكيد
هاك السنة يغني عن الشرب والزاد
نار بقلبي تشتعل منك وتزيد
واليا قريت بدفتري حبك ازداد
اقرأ قصيد كان له منك ترديد
يوم القصايد كلها فيك واجداد
واليوم صارت فرحة العيد ما تفيد
يومك تصد وتنهي الحب بعناد
تنهيه مادري ليه يا سيد السيد
ويش السبب وش صار يا غض الأنهاد
ما جتلك الدنيا على كيف ما تريد
ولا صدقت هروج مبغض وحساد
أنا انتهيت وتبت من موعد العيد
ويوم عرفتك فيه لا عاد ولا عاد
