كلمة بلا معنى.. جسد ما لها روح
وجسد.. بليا روح من كان يبغاه
وشعرٍ بلا معناه ما فيه مصلوح
ما يستفيد اللي تمعن بمعناه
ورجلٍ بليا دين ما هو بممدوح
ما ينمدح من كب دينه وخلاه
يعيش في لوعات وهموم وجروح
والله ما يلقى السعادة بدنياه
ياتاركٍ فرض الولي ما انت مسموح
جميع ماسويت ملزوم تلقاه
كل الذي سويت محفوظ باللوح
الله ولي الناس ماشي يخفاه
وعن هادم الذات واين انت بتروح
لك يوم حدد بالسجل ما تعداه
امكن ترى التوبة لها باب مفتوح
يمديك.. ثم يمديك والله.. والله
اغنم زمانك فرصة العمر لا تروح
وعمل عمل طيب يقربك لله
هذا كلام الصدق ينقال بوضوح
عله يفيد اللي تمعن بمعناه
