من سنين وفي فؤادي غصن وأزريت أستظلّه

من سنين وهاجسي ينزف وخفاقي يعاني

من سنين وطاير الاحلام ما عوّد محلَّه

والاماني مالها في موطن امالي مواني

والطعون تراود ظعون الخفوق وتستحلَّه

والفرح ما كن له يوم عبر بين المحاني

لين جتني تنسج شراع الوصال وتستهلَّه

واستكانت في معاليقي على وكر الأماني

وجت تسوق العذر في كف الحضور وتحتفلَّه

وأمطرت بين الضلوع الحدب قيفان وأغاني

وأورقت داخل شراييني رياحينه وفلّه

وإنتثر عطره على جرد المداهيل وكساني

وابتديت أسأل مواريد المواجع وأستدَّله

وكل عرقٍ ما عذرني منه في لحظة عطاني

وقلت وطيور الفرح ترتع على متنه وظلَّه

كم بقالي فيك من وصلك وكم جرحٍ عصاني

قالت انت اللي خذيت الصوت ترحاله وحلَّه

وانت ميعاد الخفوق اللي بعد غيبه لقاني

وانت مدهال الهجوس اللي تجيه ولا تملَّه

وانت حلمٍ قبل ادّور عن مواعيده لفاني

قلت وامال السنين اللي غدت مني مطلّه

والله انه تو ما غرد علي غصني زماني

وطاير الاحلام عاد اليوم وأمرح في محلّه

وجرحى اللي من سنين بداخلي غاب ونساني