اصبر لعل الله يا ابو عيد يأجرك
عسى ولي الكون يجبر مصابك
كان الحزن كدر يا أبو عيد خاطرك
اصبر عسى مولاك يجزل ثوابك
اصبر على المقدور والرب يسترك
انت الخلف انت العوض والبقابك
اصبر وشجع يالسنافي ضمايرك
اكظم غضب قلبك واملك اعصابك
وانت الذي كل الحمولة تناظرك
بالصبر عند الجايحة يقتدابك
ويا ابو فهد يا القرم ربك يصبرك
صبرك على حكم القدر واحتسابك
يا من فقد عايش بحزنك نشاطرك
مصابنا يا مسندي هو مصابك
جينا نضم شعورنا مع مشاعرك
ولا المقدر ما ترده اصحابك
مرحوم يا من ما سلك مسلك الشرك
بالحل لك يدعون جملة احبابك
نفسك زكية دوم بالخير تأمرك
ونزهت عن كل المعايب جنابك
يالزاكي اللي ما تناظر قصايرك
ولا يوم جارك بالمذمة حكابك
يا اللي بفعل الخير طابت مخابرك
فعل المروة والصخى يلتقابك
وإلى لفاك اللي من البعد زايرك
من زار بيتك قلت له يا هلا بك
كنه بياض الشاش ناصع ضمايرك
عند البعيد وعند داني اقرابك
يلطف بك اللي مطلع في سرايرك
نطلب عسى المولى يخفف عذابك
عساه بالجنة وليك يبشرك
وعساك تحمل في يمينك كتابك
