يا هلا بك جعل من قالها كذب ايهوي
هوية اوراق الشجر بالخريف من الفصول
طلة المحبوب عندي لها قدر قوي
تفتديها طلة مالها عندي قبول
يوم سلم ثم تكلم كلام مستوي
قاطف معناه من جنة الثغر الخجول
ابتداني منطق بالمحبة مرتوي
ما سمعته زين بس الوكاد انه امعسول
ودي افطن هرجته لكن السمع ايغوي
ضيعتني نظرة في تواصيفه تجول
في جماله سكة للسفر ما تنطوي
كلما سافرت فيها بعدت من الوصول
آتسلى وارفع الصوت بالحان ابدوي
طرقي بالشعر يقصر طريقه لا يطول
واصحب طيوفه خوي والطريق بلا خوي
يتعب الماشين مثل الرحيل بلا رحول
واكتبه شعر من اشعور حبه يحتوي
كل معنى للرجا والمهابه والمثول
وارسمه لوحة خبير على فكر سوي
لوحة بالعين تنظر ويسمع وش تقول
عن غلاه انشد عيون وخفوق المهتوي
الغلا ما يعترف بالبصاير والعقول
ادري ان عيني تعذب وقلبي منكوي
واشبع من الشوق ويزيدني جوع ونحول
من بعد عرفه وعقلي وحيد منطوي
ادري ان العقل عند المحب أكبر عذول
