يا سعود عقبك جيت رجم بنيناه

وشرحت له يا سعود عما جرالي

قلت الزمن يارجم ذا ما عرفناه

يومٍ لك ويومٍ تشوف الهوالي

قال إنت جاهل به ترى ذي سواياه

ما كان ضم الكون هو للزوالي

قلت انصح اللي جاك ضايع بدنياه

ما عاد يفرق بين مر وحالي

قال الصلاة وصوم والحج محلاه

وصلة الرحم توصل قصير الحبالي

قلت أحمد الله طايعه وأترجاه

ربي كريم جعل يلطف بحالي

قال إنتبه عن درب حذراه حذراه

درب الهوى ما يرث إلا الهبالي

قلت آه فات الفوت هذا مشيناه

والصوت عقب الفوت ما جاب غالي

قال انتهيت وعزتي لك من الآه

تقعد بشمس وصاحبك بالظلالي