ياللي تشكى من زمان كما القوس
منعاج والمنعاج يخلف عزومك
وقتٍ يغث البال والقلب محسوس
كم واحدٍ باسباب وقتك يلومك
الى رقدت الليل داهمك كابوس
والى صحيت الصبح ضاعت علومك
حظك مقلب يالمكافح ومنحوس
مار اطلب الله تنفرج لك همومك
يقضي لزومك طيبٍ عنده فلوس
والا المفلس كيف يقضي لزومك
احسب حسابك والليالي لك دروس
لاتختلف ما بين ليلك ويومك
اثبت ولا تصبح مع الناس معكوس
والى حلمت اصحى تغرك حلومك
بعض الاوادم يلبس اللبس منكوس
والى نشدته عذربك في هدومك
تلقى بقلبه حب للشر مغروس
يفزع عليك الى تعزوو خصومك
حنا لقينا صيفته صيفة السوس
يدخل على قومه بتهمه لقومك
مصيبةٍ من كبرها شابت الروس
كم مرة فزيت من حلو نومك
واختام كل القول من فيه ناموس
يزيل عنك الضيق ساعة قدومك
