ياوطنا ما نبيعك بالرخيص ولا بغالي

نرخص الأرواح ونضحي من أجلك بالحياه

ياو طنا حن عمى عين العدى يوم النزالي

ما يدنس رملك الطاهر دناس ولا طغاه

يا فهدنا يا زعيم الخير يا خير الرجالي

يا فهدنا يا وسام المجد وأنت اللي بناه

يافهدنا يا عظيم الشان يا صقر الخصالي

يافهدنا يا عمود الحق في كل اتجاه

مرت العشرين عام في وئام وفي وصالي

والرخاء والأمن سائد والكريم الله عطاه

عهدك الميمون عشنا فيه وأنجزنا المحالي

والأمور تسهلت وتيسرت بعد العناه

ساعدك يسلم عضيدك للخفيفه والثقالي

أبو متعب فيه تعجز كلمة الشاعر وفاه

ما يحيل وما يميل درب الوفى بالاعتدالي

خطوته محسوبه عنده وتمشي في رضاه

خاطره طيب ونفسه بالغه حد الجمالي

ليت كل الناس مثله كانت الدنيا حلاه

وأبو خالد عزوة المحتاج والشعب المثالي

ما سوى سلطان لا منه وقف كلا يراه

درعنا يوم الحروب الطاحنة يوم القتالي

وافرع القوات تشهد وارضنا حتى سماه

البلاد بلادنا والشرع ما فيه اختلالي

والتفاني والوفي طبع السعودي من صباه

جيشنا ومواطنينا سيرهم نحو المعالي

والحدود محزمه بجنودها ضد الغزاه

والخيانة والرذيلة والردية والهبالي

ما لها في شعبنا مسكن ولا حتى هواه

هذا شان اللي تربى في كنف حكم العدالي

والملك عبد العزيز اللي ذرى فيها ذاره

عاشوا آل سعود ذخر للبعيد وللموالي

عاشوا الحكام والشيطان دق الله قفاه

عاشوا آل سعود درع للبلاد وراس مالي

خادم البيتين واخوانه قناديل الحياه