يطيب الشعر في فهد العرب خص.. وفي آل سعود

تسامى بيوتنا.. وتجي مقفّاةٍ وموزونه

اقول.. ولا يوفّي القول كل فعل لهم محمود

وأنا من عرض من قال القوافي وأزرت لحونه

ملكنا قائد الأمة ومعه اخوانه له عضود

الى جاهم ضعيف قاموا لحمله يشيلونه

نعمنا بالرخاء، والأمن، والراحة، وبتنا رقود

ما دام ان الحكم في عصمة رجال يضبطونه

على راحة مواطنهم يقومون الليالي السود

وباب قصورهم دوم مهجوج ما يصكونه

أداروا دفة الحكم ونعمنا في سهود مهود

ولا ديرة بها أمن.. مثل امن تعيشونه

عسى الله ما يغيرها علينا نعمته.. ويزود

موفر كل شيء لنا.. وما نطلب يجيبونه

اشكروا ومدوا يديكم لرب واحد معبود

على هالخير.. وادعوا للوطن واللي يحكمونه

عسى الله يرحم اللي راح منهم يومه الموعود

ويحفظ منهم الباقي.. مثل ما هم يحفظونه

بدأ عبد العزيز.. ثم جاء عقبه ابناه سعود

وفيصل، ثم خالد، ثم فهد اللي تشوفونه

فهدنا.. لأمة الاسلام املها وحلمها المنشود

الى ضاقت بكل المسلمين الأرض ينصونه

وحنا دومٍ بخيرٍ ما دام انك لنا موجود

عسى الله يطول بعمرك لنا ذخر.. ولنا معونه

فذا يومك ملكنا اللي بطيب الفعل له مشهود

معززنا.. مكرمنا وحاشمنا عن الهونه

يقوله من عطاك البيعة.. وأهله عطوك عهود

قبل عشرين عام لك على حبك يربونه

لبست البدلة.. وأقسم على المصحف برب الجود

فداك الروح، والأولاد، والأملاك مقرونه

يابو فيصل بعد ربي على يدك الأمل معقود

وانا خادمك روحي في سبيل رضاك مرهونه

وأنا خادمك ما لأحد فضل مهما بذل مجهود

نوفي طيبكم مثل المدين يوفي ديونه