الا يا الله يا اللي يسجد المخلوق لرضاه

تديم النعمه اللي ضافيه يا خير معبود

ترى الواجب على المسلم يقول الحمد لله

مضى عشرين عام امن ورخا وسهود ومهود

من الله ثم من عدل أبو فيصل لا عدمناه

حكيم الوقت لاجل شعبه يبذل كل مجهود

رعى شعبه عسى ربي يمتع به ويرعاه

نفاخر به الى جن الليالي كلهن سود

الا يا كثر فزعاته ولا ياطيب يمناه

معلمه السياسة عودها المدفون بالعود

مخلي الذيب يجفل بالخلا الخالي من الشاه

ابو تركي ذرى الخايف ومزبن كل مضهود

زعيم العرب شرق وغرب من يوم الله انشاه

يحصل مطلبه لو الطلب ما هوب موجود

يحل المعجزات وما عطت يمناه يلقاه

بيومٍ ما يلد الوالد الشايب للمولود

لعله بالنعيم وفي جنان الخلد مثواه

ترى هذا الزعيم اللي على غيره خذا الزود

أخذ نجد الجهل لولا الله ابرك ثم لولاه

جميع اهل الجهل سوى بهم حاوي ومردود

ومشاهم على الدين الحنيف ولا تعداه

فعايله الجميله مالهن عداد وحدود

وخلفنا في سلفنا بالعداله كنه اياه

انا اقول الصحيح اللي معه برهان وشهود

على الحلم وعلى العلم الصحيح ابوه وصاه

وراعي العدل بامر الله يحصل كل مقصود

الى عممن الاريا من حداه الوقت ينصاه

حجا من يتلجي بحماه عن طارد ومطرود

عياله مثل شعبه ماحدٍ سوى سواياه

على شعبه سحابٍ باوله برّاق ورعود