يا ويش بنت وثقت بين شخصين

واحد أخذ نفعه والآخر تضره

تضر مع ناس عفون وبخيلين

معروفهم ما شيف بالناس مره

اللغز حليته وحلي ابيتين

واللي كتب ها اللغز لله دره

كفالة يحتاجها طالب الدين

والمعترض للناس يكفيك شره

عبر التراث نشاهد الزين والزين

صفحة جميلة من قراها تسره

مكفولة عن وضعها موضع الشين

ويسلم لها من حط جهده مبره

لغزك نسجته يا المحنك فبيتين

والحل واضح مثل نجم المجرة

هذي الكفالة وثقت بين شخصين

عساك سالم من بخيل يتشره

ترى الوفا من طبع ناس وفيين

والعفن ما يأمن هل الطيب شره

يبين لامنك "كفلته" بقرشين

ومن فزعتك ما تجني الا المضره

يا مرحبا أهلاً هلا فيك الفين

اعداد من يكفل وشاف المضره

بدايته جمالة بين الاثنين

ونهايته تصبح ندامة وحسره

لغزك يا بو خالد على الرأس والعين

وترى الكفالة خير وإلا مضره

خير مع اللي للمراجل عناوين

وإلا الردي يكفيك ربي لشره

أهلاً هلا بك يا فهد عدة الصين

بتراثنا لغزك لقينا مقره

واللي تورط يفزع لواحد شين

ترى "الكفالة" للمشاكل تجره

قريت لغز يعجب الفكر والعين

عرفت حل اللغز من دون جره

كفالة تكتب على غارم الدين

كفاكم الله يا الطويان شره

اليا تكبر ناقص العقل والدين

ما سوى عند الناس مثقال ذره

ما يوفي الديان غير الوفيين

واللي نصب حبل الكفالة يجره

ترى الكفالة يا الرجال الفهيمين

مضرة يا كبرها من مضرة

مضرة جتني من الربع الادنين

من دون خيره ليت يكفيك شره

حي الغلا حي العطا والتثامين

حي الوفا حي الهنا والمسرة

جودي بوصلك يالقريحة ابيتين

كود "الكفالة" حل مثلي تقره

يا صفحة تراث الجزيرة تعيشين

واللي يشارك فيك لله دره

ويا بن طويان "الكفالة" من سنين

ينشب بها رجل ورجل تسره

فهد جوابك عارفينه كريمين

حييت ما بانت انجوم المجره

حذراك يالطويان لا تكفل بدين

حتى الذي سدد يجيك ايتشره

ما فيه معروف تعلا على الدين

وكفالة أهل الطيب فيها المسره

يالخالدي أنا كفلت الملايين

والحمد لله ما لحقنا مضرة