خذني ليا غاب القمر واظلم الليل
خذني قبل لا تشرق الشمس وتغيب
عقبك سهادي نوح حزن وبهاذيل
عقبك أنا والليل والهم أصاحيب
بوح المشاعر ترجمته الهماليل
من حر غربال الجروح المعاطيب
ليت السوالف فيك ليت التعاليل
مرة تحس بلوعة سقمها الشيب
شبيت جمرك وانتهض فاتر الحيل
يسوق شرهات الغلا والمطاليب
يالمترف المياس خل المظاليل
تضمني ضم الضلوع المحاديب
مثلي ليا هب الهوى يشرب الويل
وليا ضميتك ما تلبسني العيب
الجدي منك يغار ما دامك سهيل
معذور دامك تجمع الزين والطيب
وتعال خذني قبل لا يظلم الليل
خذني قبل يشرق محياك وتغيب
