سلام يا دار الغضي ناعم العود
عمار يا دار الغلا والغلايل
ياما بك العين امتلت سهر ورقود
وقلبي صفق عوج الضلوع النحايل
ساعات مرتاح وساعات ملهود
وساعات دمعي فوق خدي همايل
ياما مشى بارضك مظاهير وورود
وردوا على جوك جميع القبايل
واليوم ما بك من هاك الوقت موجود
ما كن فيك من الملا زال زايل
ماغير جدران بها تلعب النود
وغريس ميت وكم بئر ونثايل
وين البيوت اللي بها يذكر الجود
ما شوف فيها للنشاما دلايل
وين الدلال ودنه النجر يا سعود
ونار سناها بالمساء له شعايل
راحو هله مفقود يبكيه مفقود
بكا صلف لافي بكا عبيد صايل
ماكنهم به خايلوا مزن ورعود
ولاكنهم ساقوا ضعون الرحايل
وقت يمر ولا بهذا العمر زود
طال أو قصر تاليه ما من صمايل
ولاقول بالباقين نكران وجحود
على السلوم أمواصلين الحصايل
ربع لهم بالمرجلة مدح وشهود
مثل الجمال اللي تشيل الثقايل
ولكن تعبيري عن الوقت مجهود
عبره وذكرى للسنين الأوايل
الحي يذكر ما مضى حب وعهود
لابد ما يذكر ربيع ومخايل
أيامه البيضاء بها يذكر السود
وأيام حزنه والفرح والجمايل
وأنا ذكرت الريف والناس والذود
في وادي توه من الوسم سايل
ياطبه الضايق نسى الهم والكود
وارتاح باله واعتدل كل مايل
وغير الوناسه ما نبي شي مقصود
والعافيه وجلوس با رياف حايل
