والله لا أبكي والبكى أقل تعبير
عن حزني اللي لاجين في ضميري
لكن ماني بكافر بالمقادير
وأدرن مكتوب الإله بيصيري
اليوم من فرقاك ياخوي يأمير
جرحي لجا تحت الضلاع القصيري
تحت الضلوع اللي سوات البواكير
جرحي على فرقى الشقيق الكبيري
أخوي ياللي من الرجال المشاهير
شيخ ولد شيخ يجر الجريري
وأخوي إلي من الرجال المسافير
شيخ ولد شيخ لربعه سفيري
وأخوي ياللي بكلمته فالمحاضير
يثبت بها حقه بليا شويري
وأخوي ياللي ماحصل منه تقصير
في أيام كان لشؤون ربعه يديري
وأخوي ياللي يجبر الوضع تجبير
سوات ماتجبر عظام الكسيري
وأخوي اللي يقطع الشر بالخير
خبير في شؤون الحياة وقديري
وأخوي ياللي ماهرج بالثراثير
ولا طاع هرج مشعبين البعيري
وأخوي ياللي ما مشى في المحاذير
وأحل وأحلا من زلال الغديري
وأخوي ياللي يعطي الأمر تفكير
بعيد النظر مان بنظره بقصيري
وأخوى ياللي يعطي الأخو تقدير
ما قال أنا الكبير وأنت الصغيري
وأخوي ياللي مانسجم للزامير
ولا أصغى بسمعه يستمع دق زيري
وأخوى ياللي ينصف الليل تكبير
للي بعفوه كلنا نستجيري
هو سيفي إلي يضرب الرأس ويطير
وهو حصني اللي في ذراه أستديري
أتلي عهد لي فيه يوم الحفافير
صكوا عليه وصك جمع غفيري
وحطوه في قبر كما حفرة البير
واقفيت من عنده ودمعي غزيري
والكبد كن يحز فيها مناشير
أو كنها تشتب فيها السعيري
عساه للجنة ونلقاه في خير
في جنة الفردوس يوم النشيري
