حزنٍ سطى بالحشا عوّد له همومه
فجّر جروحٍ قديمه ذكرها شاني
يالله عسى عمتي باللحد مرحومه
عسى تولاه بالمرضاة رحماني
أمثالكم يا أم بندر شبه معدومه
جمعتي الخلق هو والدين واحساني
ما كل من قيل عمه تزهي عمومه
إلا الذي يشبهك بنت اللحيداني
يا ليتني ما سمعت العلم وعلومه
وليت المَلَك قبل يومٍ لك تنصاني
هلّت عيوني بيومك دم ما ألومه
اللي يعرفك دموعه فوق الأوجاني
من يوم قالوا عليك اللبن مردومه
خيم علينا حزن ما هو بالأحزاني
نوّرتي القبر عقب الضيق وظلومه
واستبشر اللي حولك قبل سكاني
يا عل قبرك عليه السحب وغيومه
وعسى عليه النفل مع خضر الأغصاني
ويا عل قبره تعلا سامي نجومه
تشوف ما لا نشوفه ربعٍ وخلاني
والآدمي موعده باللوح مرقومه
لا جا الأجل ما تأخر يومٍ أو ثاني
يالله يا مقدر الآجال محتومه
تقبل دعانا لها بالسر واعلاني
وتقديرها في مكانٍ فوق محشومه
في جنةٍ عالية والباب ريّاني
