العمر يمضي سريع ولاحسبنا الزمان
ماباقي إلا نهايتنا يصافحها
اعطيك قلبي أبيك تحسسه بالامان
وهبايبك برد تلفحني نفايحها
ازعل ولكنّي اجحد شرهتي لاتبان
وصك بوابة الشرهات وافتحها
أخاف لجرح شعورك وأطفي الشمعدان
ولاّ انت نفسي تزعّلها وتفرحها
وشلون أدوّر ورى صمتك حياة وحنان
وغربة مشاعرك تخسرني وتربحها
يغار من عودك الميّاس كم خيزران
والغرة اللي شذا النسمة يمازحها
ياريم أظنك نسيت ورحت وادي ماوان
طلعت من روض قلبي في مسارحها
عسى المطر يروي اعلاها وينزل طمان
الديرة اللي مداهيلك مسايحها
ويربع الوادي اللي صار روضة جنان
من دجت فيها بكور الغيم صبحها
وتزهر بها وردة الجوري مع القحويان
وتصير طيبٍ تسوق النود فايحها
وان كان حبي بقلبك ما بقى له مكان
قلي والاسباب مابي منك تشرحها
تراي وصلت حدي يالله المستعان
تعبت أنا اغفرلك الزلات وأدمحها
