تمر كل يوم تاخذ قلبي المشتاق في يمناك
وتتركني على جال الهموم وعنك تبعدني
يتوه الشارع من الصمت لامنك نثرت خطاك
وأنا يا قلب لا تحزن ظلالي بس يسندني
تعبت أوقف وأناظر وأرتعد واسكت وأصدّ هناك
أنا شسويت لك يوم أنك تماري وتجهدني
أبيك ترد قلبي أو تضم اللي تعب يهواك
خذيت القلب باليمنى.. متى يسراك تنجدني
أنادي قلبي المسكين لا من راح هو وإياك
ألا يا قلب لا تبطي.. ضلوعي عنك تنشدني
حبيبي كيف ابتهنا بليا قلب وبليّاك
أنا أحبك ولكن منيتي أنساك ساعدني
على ها الحال لي ثاني ربيع وكلمتي ما أقساك
رفعت الراية البيضاء.. بعاهدك وتعاهدني
تذوقني شهد قربك وترويني بصافي ماك
أو تغير طريق فيه أشاهدك وتشاهدني
