يا نجد غني بالطرب للمحبين
إنتي بعز ما حسبتي حسابه
هلي وقومي وافرحي لا تنامين
بعبد العزيز اللي برز في شبابه
ابن الملوك الحاكمين الحكيمين
ولد الأسود اللي حموا كل غابه
عمره صغيرٍ والفعايل كبيرين
ووقته قصيرٍ والعظايم مشابه
خرج على شبه الجزيرة بنورين
نور الجبين ونور جَدّه مشابه
ابن فهد ما هو خطاة البخيلين
شهم عن المحتاج ماصك بابه
عجل مع المضيوم والمستغيثين
يفك ضيم الملتجي لا لجابه
زبن الخوي يا في بحق الوفيين
واللي يخونه نومته ما هنابه
هذي فعوله قبل سن الثلاثين
وشلون بالخمسين يظهر جنابه
كم كربة دارت بناس خفيين
وصلت أخو فيصل وعالج صوابه
وكم واحد صكوا عليه الديايين
سدد عنه ما خاب فيه الرجا به
وكم واحد يرجيه بين المساجين
محكوم بالإعدام باول شبابه
وصى وصاته للأهل والمحبين
واخبرهم انه مبعد في غيابه
أبوه من حزنه غدى الليل ليلين
وامه ادموعه مثل وبل السحابه
عبدالعزيز أرسل رجال وملايين
وساوم على دمه وما له صخابه
واعتق رقبته عند نشر الدواوين
والسيف الأبيض رجعه في نصابه
يبيه يوم الحشر عند الموازين
يشهد ويدخل راجح في حسابه
أبشر يا بن فهد دعولك مصلين
يدعون لك بالليل وقت الإجابه
يجزاك بالدنيا قبولٍ وتمكين
ويفتح لك الرحمن عزه وبابه
حيثك عزيز وحزت ناسٍ عزيزين
وقربت خير اللي مشوا في شعابه
الحر يفرد من فروخ الشياهيين
والذيب ما يالف بغير الذيابه
عسى الذي نزّل تبارك وياسين
يحمي جنابك يا عظيم المهابه
*