أمني النفس في شوفة هوى بالي
وأقول بكره يجي والا يجي بعده
وان مر وقت التمني ما تهيالي
زادت ظنوني وزاد الشوق في بعده
ثم التفت ودعيت وقلت يا والي
تجيب خلٍ بشوفه حالتي سعده
ابكحل العين في شوفتك يالغالي
وتشرح ظروفك وعذرٍ غيبك ابده
وش يمنعك يا هوى بالي عن أوصالي
جاوب ترى القلب زاد من الجفا وجده
كانه تغلى بتبقى راسٍ لمالي
مهما خفوقك بذل في صدته جهده
وان كان قصدك جفا يا زين عزالي
إذا انقطع حبل وصلك كيف انا أعقده
وان كان قلبك بغيري داله سالي
ماني بناسي غرامك لو مضى عهده
وان كان قصدك كلام الناس لا تبالي
ترى محاكيك منهم ولعت كبده
وما تنطفي نار كبدي لين تصفالي
واجلس معك وآخذ من علومك الزبده
زبدة علومك وعد تحيي به آمالي
وتقر عينٍ سببك النوم تفتقده
أبي اللقا والوفا في كل الأحوالي
والحر يا منيتي مديون في وعده
