سألت من هو ما يخيب دخيله

القادر المحمود في كل الاحوال

من دون عفوه كل نفس ذليله

لو غرها في عمرها كثر الآمال

الواحد اللي كلنا ننحني له

الظاهر الرحمن والباطن العال

اللي وعد عبده مقام الوسيله

المانع المعطي كتب حد الآجال

يارب ترحم من صفاته نبيله

في موقف لاعم ينفع ولا خال

ويصير قبره جنة له ظليله

وتعيذه اللهم ضكات الاغلال

وتجعل له من الحور بكر حليله

وتجزاه كثر خطاه عشرات الامثال

لمحمد الخالد مكان بنجيله

مردنا بنجيه لو طال الامهال

يا رحمة الله عجلي وانزلي له

بامرٍ من اللي بامره الغيث ينهال

كلٍ عليه تراب قبره يهيله

وكل العيون من الحزن دمعها سال

واقفوا وكلٍ تنفض ايده شليله

يارب عفوك يسأل الحين وش قال

ما ينفع المذنب عظامٍ جليله

ولا يبخس المؤمن من الخير مثقال

يا حزن لا تجني علي كل ليله

ترى مصابي زاد وهمومي ثقال

وما عاد به يا صدر قلب تشيله

مدفون تحت الارض ملفوف بجلال

وش في يدين الخلق للموت حيله

الا الصبر ومجالد الحزن لو طال

ياللي تخيل البرق لا لا تخيله

لو ربّعت عامين ترجع للامحال

دنيا تفرق بين خل وخليله

عاداتها ترمي على الناس الاهوال