ياراكب اللي نازح البعد يدنيه
اسرع من اللي للهدف يضربنه
جيب تواصيف الطلب كامله فيه
من مصنعه كل الوصوفه احتونه
اربع الاف وخمس حار النظر فيه
لوزودوا فيه الثمن مانمنه
بخاخ من صافي وقود يغذيه
ويايات مع درب الوعر ريحنه
لادق سلفه زان للكيف راعيه
قطع الفجوج الخاليه ماازملنه
ماكل موتر مع دروبه يماشيه
كم واحد مع ساقته وهقنه
هو منوتي لو من ترجي مناويه
كل تمنى قبلنا واسعدنه
نبغا لنا خد بعيده محاريه
في ماقع زرق الغلب يدهلنه
في ماقع غر المزون امتمثنيه
من وبلهن كم وادي سيلنه
عقب المطر ماداج بالقاع ماشيه
الا ام سالم صوتها ماتكنه
يازين شب النار والكيف راعيه
جاب الدلال وجاب هيله وبنه
بخوة رجال كل رجل هقاويه
كسب العلوم الطيبه ماغونه
ويازين هد مسرول يوم احليه
ياخذ من طيار القطا لو عصنه
اليا انزعج ياسعود من كف راعيه
عجل طياره والسبوق اعقبنه
هذي طراة العمر والموت قافيه
والموت حق لكل نفس وسنه
