على البال طاري والطواري تجي وتروح
وشي طرا في البال يا صعب تحقيقه
لو أبينه للناس صار الهدف مفضوح
ومن حط له نيشان كثروا تفافيقه
ولكن بكنه في الحشاء لو تروح الروح
وبأخذ مع الأفكار وقفه وتحليقه
أعانق خيالي لا سبح في محيط النوح
وكفخ مثل حر يوم فكوا مسابيقه
لكن المصيبة كان غنى حمام الدوح
تهيضني أنغامه وأغنى طواريقه
وأقوم آتذكر يوم باب الهنا مفتوح
وعليه يضيق الكون غربه وتشريقه
لو أحط فوق الصدر دله شوي وتفوح
ليا منها عادت على صدري الضيقه
مقادير واللي صار مكتوب وسط اللوح
وباصبر لو ان الصبر ساعات ما طيقه
جروح الهوى طابن وجاء غيرهن جروح
جروح الزمان اللي ينوخ مطاليقه
رفيقي ليا أخطأ قلت رح والخطأ مدموح
وإذا أخطأ رفيق القوم عن قصده أعيقه
ولكن خطأ الزمان من عانده مطروح
وذا حكم خلاق البشر في مخاليقه
رقيت الجبال وشفت فوق الجبال سفوح
ومن قام ينظر فوق ياسرع تدنيقه
هذا ما جرى واللي جرى ما يعد مزوح
وسرٍ كتمته قمت واحكمت تغليقه
على هامش الآمال لين البروق تلوح
وبطلب جليل الملك غفوه وتوفيقه
أنا لي طموح وكل مخلوق له طموح
وطموحي صعيب ولا أقنع إلا بتحقيقه
